राष्ट्रवादीच्या भूमिकेवर राजकीय चर्चांना उधाण; शरद पवारांच्या बैठकीत रोहित पवार गैरहजर, नव्या समीकरणांची चर्चा पुन्हा रंगली

राष्ट्रवादीच्या भूमिकेवर राजकीय चर्चांना उधाण; शरद पवारांच्या बैठकीत रोहित पवार गैरहजर, नव्या समीकरणांची चर्चा पुन्हा रंगली

राज्यात गेल्या काही दिवसांपासून शरद पवार यांच्या नेतृत्वाखालील राष्ट्रवादी काँग्रेस (शरदचंद्र पवार) पक्षाच्या भविष्यातील राजकीय भूमिकेबाबत विविध चर्चांना उधाण आले आहे. पक्ष महायुतीत सहभागी होणार की काँग्रेससोबतच राहणार, याबाबत राजकीय वर्तुळात तर्क-वितर्क सुरू असतानाच मुख्यमंत्री देवेंद्र फडणवीस यांनी महायुतीत कोणताही नवीन पक्ष सहभागी होणार नसल्याचे स्पष्ट केले आहे. मात्र, या चर्चांदरम्यान शरद पवार यांनी आज पक्षाच्या आमदारांची बैठक घेतल्याने राजकीय घडामोडींना आणखी वेग आला आहे.

मुंबईत झालेल्या या बैठकीत शरद पवार यांनी पक्षाच्या आमदारांशी सविस्तर संवाद साधत सध्याच्या राजकीय परिस्थितीवर चर्चा केली. माध्यमांमध्ये सुरू असलेल्या चर्चांमुळे कार्यकर्ते आणि आमदारांमध्ये निर्माण झालेल्या संभ्रमावरही त्यांनी भूमिका स्पष्ट केल्याचे सांगितले जाते. मात्र, या बैठकीत आमदार रोहित पवार यांची अनुपस्थिती विशेष चर्चेचा विषय ठरली.

राजकीय सूत्रांच्या माहितीनुसार, भाजपसोबत जाण्याच्या शक्यतेला रोहित पवार यांचा सुरुवातीपासूनच विरोध असल्याचे बोलले जात आहे. त्यामुळेच त्यांनी या बैठकीला उपस्थित राहणे टाळल्याची चर्चा राजकीय वर्तुळात रंगली आहे. अधिकृतपणे याबाबत कोणतीही भूमिका जाहीर करण्यात आलेली नसली तरी त्यांच्या अनुपस्थितीमुळे अनेक तर्कांना उधाण आले आहे.

याआधी मागील आठवड्यात राष्ट्रवादी काँग्रेस (शरदचंद्र पवार) पक्षाच्या आमदारांची विधिमंडळात महत्त्वाची बैठक पार पडली होती. त्या बैठकीत अनेक आमदारांनी पक्षाच्या भविष्यातील राजकीय वाटचालीबाबत वरिष्ठ नेतृत्वाकडे थेट प्रश्न उपस्थित केले होते. पक्ष काँग्रेसमध्ये विलीन होणार आहे की राष्ट्रीय लोकशाही आघाडी (एनडीए)मध्ये सहभागी होणार, याबाबत स्पष्ट भूमिका मांडण्याची मागणी आमदारांनी केली होती.

सूत्रांच्या माहितीनुसार, काही आमदारांनी काँग्रेससोबत जाण्याचा निर्णय झाल्यास आपली भूमिका वेगळी असू शकते, असे स्पष्ट संकेत दिले होते. दुसरीकडे, रोहित पवार यांनी भाजपसोबत जाण्याला स्पष्ट विरोध दर्शवत बैठकीतून बाहेर पडण्याचा निर्णय घेतल्याची माहिती समोर आली होती. त्यामुळे आजच्या बैठकीतील त्यांची अनुपस्थिती पुन्हा चर्चेचा विषय ठरली.

दरम्यान, रोहित पवार यांनी बुधवारी सकाळी सोशल मीडियावर पोस्ट करत आपण शिक्षकांच्या आंदोलनाला उशिरा पोहोचणार असल्याचे सांगितले होते. कारण शरद पवार विधिमंडळात येणार असल्याने त्यांच्यासोबत चर्चा होणार असल्याचे त्यांनी नमूद केले होते. मात्र, प्रत्यक्षात त्यांनी शरद पवारांच्या बैठकीला हजेरी न लावता शिक्षकांच्या आंदोलनात सहभागी होण्यास प्राधान्य दिले. त्यामुळे त्यांच्या राजकीय भूमिकेबाबत पुन्हा चर्चा सुरू झाली आहे.

दरम्यान, महायुतीतील शिवसेनेतही अंतर्गत नाराजी वाढत असल्याची माहिती समोर येत आहे. एकनाथ शिंदे यांच्या नेतृत्वाखालील शिवसेनेच्या काही आमदारांनी मंत्र्यांकडून विकासकामांना अपेक्षित गती मिळत नसल्याची नाराजी व्यक्त केल्याचे सांगितले जात आहे. अनेक वेळा पक्ष नेतृत्वाकडे तक्रारी करूनही परिस्थितीत सुधारणा झालेली नसल्याचे आमदारांचे म्हणणे आहे. मंत्री आश्वासने देत असले तरी प्रत्यक्षात कामे होत नसल्याने नाराजी वाढत असल्याची चर्चा राजकीय वर्तुळात सुरू आहे.

राज्यातील या सर्व घडामोडींमुळे आगामी काळात राजकीय समीकरणांमध्ये बदल होण्याची शक्यता व्यक्त केली जात आहे. मात्र, राष्ट्रवादी काँग्रेसची अधिकृत भूमिका काय असेल आणि महायुती किंवा विरोधी आघाडीबाबत पक्ष कोणता निर्णय घेणार, याकडे राज्याच्या राजकारणाचे लक्ष लागले आहे.