अहिल्यानगरमध्ये मुसळधार पावसाचा कहर; भंडारदरा परिसरात 300 मिमीपेक्षा अधिक पाऊस, पर्यटनस्थळे बंद

अहिल्यानगरमध्ये मुसळधार पावसाचा कहर; भंडारदरा परिसरात 300 मिमीपेक्षा अधिक पाऊस, पर्यटनस्थळे बंद

अहिल्यानगर आणि नाशिक जिल्ह्यांमध्ये सुरू असलेल्या मुसळधार पावसामुळे जनजीवन विस्कळीत झाले आहे. विशेषतः अहिल्यानगर जिल्ह्यातील भंडारदरा धरण परिसरात गेल्या 24 तासांत विक्रमी पावसाची नोंद झाली असून, 300 मिलीमीटरपेक्षा अधिक पाऊस कोसळल्याने संपूर्ण परिसर जलमय झाला आहे. घाटमाथ्यावरील घाटघर आणि रतनवाडी परिसरात ढगफुटीसदृश पावसामुळे नदी-नाले दुथडी भरून वाहू लागले असून, अनेक ठिकाणी पूरसदृश परिस्थिती निर्माण झाली आहे.

सतत सुरू असलेल्या अतिवृष्टीमुळे भंडारदरा परिसरातील दुर्गम आदिवासी भागातील जनजीवनावर मोठा परिणाम झाला आहे. काही गावांचा संपर्क तुटण्याची शक्यता लक्षात घेऊन स्थानिक प्रशासनाने सतर्कतेचा इशारा दिला आहे. मुसळधार पावसासोबतच जोरदार वाऱ्यामुळे रस्ते, पूल आणि अन्य पायाभूत सुविधांवरही ताण निर्माण झाला आहे. कोणतीही आपत्कालीन परिस्थिती उद्भवल्यास तातडीने मदतकार्य करता यावे यासाठी महसूल, पोलीस आणि आपत्ती व्यवस्थापन यंत्रणा सज्ज ठेवण्यात आली आहे.

भंडारदरा धरणाच्या पाणलोट क्षेत्रात मोठ्या प्रमाणावर पावसाची नोंद झाल्याने धरणातील पाणीसाठ्यात झपाट्याने वाढ होत आहे. प्रशासनाकडून परिस्थितीवर सातत्याने लक्ष ठेवले जात असून, नागरिकांना नदी, ओढे आणि नाल्यांच्या परिसरात जाणे टाळण्याचे आवाहन करण्यात आले आहे. तसेच, हवामानातील बदल लक्षात घेऊन नागरिकांनी अत्यावश्यक कामांशिवाय घराबाहेर पडू नये, असेही प्रशासनाने स्पष्ट केले आहे.

दरम्यान, पावसाचा वाढता जोर आणि संभाव्य दुर्घटना टाळण्यासाठी भंडारदरा परिसरातील सर्व धोकादायक पर्यटनस्थळे तात्पुरती बंद करण्यात आली आहेत. राज्यातील सर्वोच्च शिखर असलेल्या कळसूबाई परिसरात पर्यटकांच्या प्रवेशावर बंदी घालण्यात आली असून, ट्रेकर्ससाठी प्रसिद्ध असलेली सांदन व्हॅली, रतनवाडी परिसर तसेच ऐतिहासिक गड-किल्ल्यांवरही प्रवेश रोखण्यात आला आहे. याशिवाय, ओसंडून वाहणाऱ्या धबधब्यांच्या खाली जाण्यास किंवा सेल्फी आणि व्हिडिओसाठी गर्दी करण्यास सक्त मनाई करण्यात आली आहे.

प्रशासनाने पर्यटक आणि स्थानिक नागरिकांना अफवांवर विश्वास न ठेवता अधिकृत सूचनांचे पालन करण्याचे आवाहन केले आहे. हवामान विभागाकडून पुढील काही तासांतही जोरदार ते अतिजोरदार पावसाचा अंदाज व्यक्त करण्यात आल्याने संपूर्ण यंत्रणा अलर्ट मोडवर असून, परिस्थितीवर सातत्याने नजर ठेवण्यात येत आहे.