विधानसभेत फडणवीसांचा विरोधकांना इशारा ; चुकीची माहिती पसरवणाऱ्यांवर कारवाई होणार'

विधानसभेत फडणवीसांचा विरोधकांना इशारा; 'चुकीची माहिती पसरवणाऱ्यांवर कारवाई होणार'

मुंबई: मुंबई आणि महानगर परिसरात झालेल्या मुसळधार पावसामुळे निर्माण झालेल्या परिस्थितीवर विधानसभेत झालेल्या चर्चेदरम्यान मुख्यमंत्री देवेंद्र फडणवीस यांनी विरोधकांच्या टीकेला जोरदार प्रत्युत्तर दिले. विशेषतः कनेक्टिंग लिंकवरील स्लॅब कोसळण्याच्या घटनेवरून सुरू असलेल्या आरोपांवर त्यांनी स्पष्ट भूमिका मांडत, "मला बदनाम करा, पण महाराष्ट्राला बदनाम करू नका," असा इशारा दिला. तसेच सोशल मीडियावर चुकीची माहिती पसरवणाऱ्यांवरही त्यांनी कठोर कारवाईचा इशारा दिला.

विधानसभेत उत्तर देताना मुख्यमंत्री म्हणाले की, मुंबईत झालेल्या अतिवृष्टीमुळे काही नागरिकांचा मृत्यू झाला, ही अत्यंत दुर्दैवी बाब आहे. अशा घटना गांभीर्याने घेण्याचे निर्देश मुंबई महापालिकेला देण्यात आले असून भविष्यात अशा परिस्थितीवर अधिक प्रभावीपणे मात करण्यासाठी आवश्यक उपाययोजना केल्या जात आहेत.

मुख्यमंत्र्यांनी सांगितले की, मुंबईतील पूरस्थिती लक्षात घेऊन 370 पूरप्रवण (हॉटस्पॉट) ठिकाणांची ओळख पटवण्यात आली आहे. या भागांमध्ये भरती आणि मुसळधार पाऊस एकाच वेळी झाल्यास 30 मिनिटांच्या आत पावसाचे पाणी बाहेर काढता येईल, असा आराखडा तयार करण्यात आला असून तो केंद्र सरकारकडे मंजुरीसाठी पाठवण्यात आला आहे. या योजनेमुळे भविष्यात पावसामुळे होणाऱ्या अडचणी मोठ्या प्रमाणात कमी होतील, असा विश्वास त्यांनी व्यक्त केला.

मुंबई ट्रान्स हार्बर लिंक (अटल सेतू) आणि कनेक्टिंग लिंक प्रकल्पावरूनही मुख्यमंत्री फडणवीस यांनी महाविकास आघाडी सरकारवर निशाणा साधला. त्यांनी सांगितले की, या प्रकल्पाचा प्रस्ताव आधीच्या सरकारच्या काळात तयार झाला होता. मात्र, तत्कालीन सरकारने तब्बल 14 कारणे देत हा प्रकल्प अशक्य असल्याचे सांगून फाईल बंद केली होती. महायुती सरकारने तज्ज्ञांशी चर्चा करून तांत्रिक अडचणी दूर केल्या आणि हा महत्त्वाकांक्षी प्रकल्प प्रत्यक्षात पूर्ण करून दाखवला, असे त्यांनी स्पष्ट केले.

कनेक्टिंग लिंकवरील स्लॅब कोसळण्याच्या घटनेवरून सुरू असलेल्या टीकेलाही त्यांनी उत्तर दिले. "कुठेही संपूर्ण रस्ता तुटलेला नाही. एका घटनेच्या आधारावर महाराष्ट्रातील पायाभूत सुविधांची बदनामी करणे योग्य नाही," असे सांगत त्यांनी काही जणांवर सोशल मीडियाच्या माध्यमातून दिशाभूल करणारी माहिती पसरवल्याचा आरोप केला.

मुख्यमंत्र्यांनी यावेळी कठोर शब्दांत इशारा देत म्हटले की, "काही भाड्याचे लोक पैसे घेऊन सोशल मीडियावर चुकीची माहिती पसरवत आहेत. मला बदनाम करायचे असेल तर जरूर करा, पण महाराष्ट्राच्या विकासाची आणि प्रतिमेची बदनामी सहन केली जाणार नाही. अशा लोकांना सोडणार नाही."

यासोबतच त्यांनी प्रशासनाने या घटनेतून धडा घेतला असल्याचे सांगितले. भविष्यात अशा प्रकारच्या तांत्रिक त्रुटी टाळण्यासाठी अधिक मजबूत सुरक्षा व्यवस्था, नियमित तपासणी आणि तज्ज्ञांच्या मार्गदर्शनाखाली आवश्यक सुधारणा करण्यात येतील, असेही त्यांनी स्पष्ट केले.