गोदावरी नदीत कुटुंबाच्या आत्महत्येप्रकरणी रायफल शूटिंग कोचला अटक; पाच राज्यांत पोलिसांची शोधमोहीम

आंध्र प्रदेशातील गोदावरी नदीत उडी मारून एका अभियंता अधिकाऱ्याने कुटुंबीयांसह आत्महत्या केल्याच्या प्रकरणाला आता गंभीर वळण मिळाले आहे. या प्रकरणात पोलिसांनी रायफल शूटिंग कोच शेख सादीक खान याला उत्तर प्रदेशातील मेरठ येथून अटक केली आहे. तब्बल पाच राज्यांमध्ये शोधमोहीम राबवल्यानंतर खान पोलिसांच्या हाती लागला. सध्या त्याला आंध्र प्रदेशात आणण्यात आले असून, पोलिस कोठडीत त्याची चौकशी सुरू आहे.

ही घटना 16 आणि 17 ऑगस्टच्या मध्यरात्री राजमहेंद्रवरम येथील रोड-कम-रेल्वे पुलावर घडल्याचे सांगण्यात येते. पंचायत राज विभागातील सहाय्यक अभियंता थिल्लापुडी नुकाराजू, त्यांची पत्नी मीना, मुलगी सौजन्या आणि त्यांचा 10 वर्षांचा नातू यांनी गोदावरी नदीत उडी घेतल्याचा प्राथमिक अंदाज आहे. या घटनेत नुकाराजू, त्यांची पत्नी आणि मुलीचा मृत्यू झाला. मात्र, मच्छीमारांच्या मदतीने दहा वर्षीय मुलाला वाचवण्यात यश आले.

चिठ्ठीमुळे तपासाला नवे वळण

घटनेच्या तपासादरम्यान पोलिसांना एक चिठ्ठी सापडली. ही चिठ्ठी नुकाराजू यांनी लिहिल्याचा पोलिसांना संशय आहे. या चिठ्ठीत रायफल शूटिंग कोच शेख सादीक खान याचे नाव असल्याचे समोर आले आहे. कुटुंबाच्या मृत्यूपूर्वी घडलेल्या काही घटनांशी खानचा संबंध असल्याचे आरोप या चिठ्ठीत करण्यात आल्याचे पोलिसांचे म्हणणे आहे.

या आधारावर खानविरोधात विविध गंभीर कलमांखाली गुन्हा दाखल करण्यात आला आहे. त्याच्यावर नुकाराजू यांना विशिष्ट धर्म स्वीकारण्यासाठी दबाव आणणे, खून आणि खंडणीसह अन्य आरोप करण्यात आले आहेत. मात्र, या आरोपांची सत्यता तपासण्याचे काम पोलिसांकडून सुरू आहे.

पाच राज्यांत शोधमोहीम

खानला अटक करण्यासाठी पोलिसांनी मोठी शोधमोहीम राबवली. काकीनाडा जिल्ह्याचे पोलीस अधीक्षक बिंदु माधव यांनी दिलेल्या माहितीनुसार, या कारवाईत पाच राज्यांमध्ये दहापेक्षा अधिक पोलीस पथके तैनात करण्यात आली होती. खान मोबाइल फोनचा वापर आणि डिजिटल व्यवहार टाळत असल्याने त्याचा माग काढणे पोलिसांसाठी मोठे आव्हान ठरले.

तपास पथकांनी त्याच्या संभाव्य हालचालींचा मागोवा घेत अखेर मेरठमध्ये त्याचा ठावठिकाणा शोधून काढला. त्यानंतर खानला अटक करण्यात आली. ट्रान्झिट वॉरंटच्या माध्यमातून त्याला आंध्र प्रदेशात आणण्यात आले आहे.

कुटुंबाशी दोन वर्षांपासून ओळख

पोलिसांच्या प्राथमिक तपासानुसार, खान हा नुकाराजू यांच्या कुटुंबाच्या परिचयातील व्यक्ती होता. गेल्या सुमारे दोन वर्षांपासून त्याची कुटुंबाशी ओळख होती. नुकाराजू यांच्या नातवाच्या शाळेत तो रायफल शूटिंग कोच म्हणून कार्यरत होता. त्यामुळे कुटुंबाशी त्याचे नेमके संबंध कसे होते, त्यांच्यात कोणते व्यवहार किंवा वाद झाले होते आणि घटनेपूर्वी त्यांच्यात काय घडले, याचा तपास आता महत्त्वाचा ठरणार आहे.

दरम्यान, या प्रकरणात माजी खासदार विजयसाय रेड्डी यांनी सीबीआय किंवा एनआयएकडून चौकशी करण्याची मागणी केली आहे. या घटनेमागे मोठे षड्यंत्र आणि आंतरराष्ट्रीय संबंध असल्याचा आरोपही त्यांनी केला आहे.

मात्र, पोलिसांच्या तपासात आतापर्यंत या प्रकरणाचा ‘लव्ह जिहाद’शी संबंध आढळलेला नसल्याचे स्पष्ट करण्यात आले आहे. सध्या पोलिस खानची चौकशी करत असून, चिठ्ठीत करण्यात आलेले आरोप, कुटुंबाच्या मृत्यूमागील नेमके कारण आणि या प्रकरणात आणखी कोणाचा सहभाग आहे का, याचा तपास सुरू आहे. त्यामुळे या चौकशीतून पुढे कोणते नवे तथ्य समोर येते, याकडे सर्वांचे लक्ष लागले आहे.