छत्रपती संभाजीनगरमध्ये हॉस्पिटलच्या NICU मध्ये भीषण आग; 9 चिमुकल्यांसह 58 रुग्णांना सुरक्षित बाहेर काढले

छत्रपती संभाजीनगर : छत्रपती संभाजीनगर शहरातून पहाटेच्या सुमारास एक धक्कादायक घटना समोर आली. आकाशवाणी चौकातील एशियन हॉस्पिटलमध्ये भीषण आग लागल्याने एकच खळबळ उडाली. विशेष म्हणजे, हॉस्पिटलच्या लहान मुलांच्या अतिदक्षता विभागात अर्थात NICU मध्ये आग लागल्याने मोठा धोका निर्माण झाला होता. आग लागली त्यावेळी या विभागात चिमुकली बालके उपचार घेत होती. मात्र अग्निशमन दल, पोलीस आणि हॉस्पिटल प्रशासनाच्या तत्परतेमुळे मोठी दुर्घटना टळली.

प्राथमिक माहितीनुसार, पहाटे पावणे तीनच्या सुमारास हॉस्पिटलच्या NICU परिसरात आग लागली. एसीमध्ये झालेल्या शॉर्टसर्किटमुळे आग लागल्याची प्राथमिक शक्यता व्यक्त करण्यात येत आहे. मात्र आगीचे नेमके कारण अधिकृत तपासानंतर स्पष्ट होणार आहे.

आग लागल्याचे लक्षात येताच हॉस्पिटलमध्ये एकच गोंधळ उडाला. विशेषतः NICU सारख्या संवेदनशील विभागात आग लागल्याने डॉक्टर, नर्सिंग स्टाफ आणि इतर कर्मचाऱ्यांनी तातडीने हालचाली सुरू केल्या. याचवेळी अग्निशमन दल आणि पोलिसांना घटनेची माहिती देण्यात आली.

अवघ्या 10 ते 15 मिनिटांत आगीवर नियंत्रण

आगीची माहिती मिळताच अग्निशमन दलाच्या तब्बल पाच गाड्या घटनास्थळी दाखल झाल्या. अग्निशमन दलाच्या जवानांनी तातडीने बचावकार्य सुरू केले. हॉस्पिटलमध्ये धूर पसरत असल्याने रुग्णांना सुरक्षित ठिकाणी हलवण्याचे आव्हान अग्निशमन दल आणि हॉस्पिटल कर्मचाऱ्यांसमोर होते.

जवानांनी शर्थीचे प्रयत्न करत अवघ्या 10 ते 15 मिनिटांत आगीवर नियंत्रण मिळवले. त्यामुळे आग हॉस्पिटलच्या इतर भागांमध्ये पसरण्याचा मोठा धोका टळला. वेळेत आग नियंत्रणात आल्याने संभाव्य मोठी दुर्घटना टळल्याचे सांगण्यात येत आहे.

दरम्यान, आग विझवण्याबरोबरच हॉस्पिटलमधील रुग्णांना सुरक्षित बाहेर काढण्याचे काम युद्धपातळीवर सुरू होते.

NICU मधील चिमुकल्यांना तातडीने हलवले

आग लागली त्यावेळी NICU मध्ये उपचार घेत असलेल्या बालकांच्या सुरक्षिततेचा प्रश्न सर्वात महत्त्वाचा होता. मिळालेल्या प्राथमिक माहितीनुसार, 9 बालकांना सुरक्षितपणे बाहेर काढण्यात आले. या सर्व बालकांना परिस्थितीनुसार इतर रुग्णालयांमध्ये हलवण्यात आले.

त्यापैकी 5 बालकांना घाटी रुग्णालयात, 3 बालकांना एमजीएम रुग्णालयात आणि एका बालकाला संजीवनी हॉस्पिटलमध्ये हलवण्यात आले. सुदैवाने या घटनेत कोणतीही जीवितहानी झाल्याची माहिती नाही.

हॉस्पिटलमध्ये उपचार घेत असलेल्या चिमुकल्यांना सुरक्षितपणे बाहेर काढणे हे बचाव पथकांसमोरील मोठे आव्हान होते. मात्र डॉक्टर, परिचारिका, हॉस्पिटल कर्मचारी आणि अग्निशमन दलाच्या जवानांनी समन्वयाने काम केल्यामुळे सर्व बालकांना सुरक्षित हलवण्यात यश आले.

58 रुग्णांना सुरक्षितपणे बाहेर काढण्यात यश

महत्त्वाची बाब म्हणजे, ज्या पहिल्या मजल्यावर NICU विभाग आहे, त्या मजल्यावर एकूण 58 रुग्ण उपचार घेत होते. यामध्ये NICU मधील बालकांसोबतच जनरल वॉर्ड आणि स्पेशल रूममधील रुग्णांचा समावेश होता.

मिळालेल्या माहितीनुसार, पहिल्या मजल्यावरील रुग्णांमध्ये 36 रुग्ण जनरल विभागात, 13 रुग्ण स्पेशल रूममध्ये, तर उर्वरित रुग्ण NICU मध्ये उपचार घेत होते. आगीची तीव्रता वाढण्यापूर्वीच सर्व रुग्णांना सुरक्षितपणे बाहेर काढण्यात आले.

या बचावकार्याला मदत करण्यासाठी तब्बल 30 रुग्णवाहिका घटनास्थळी दाखल झाल्या होत्या. त्यामुळे गरज भासल्यास रुग्णांना तातडीने इतर रुग्णालयांमध्ये हलवण्याची व्यवस्था करण्यात आली होती.

पोलीस आणि आरसीपी पथकाचीही घटनास्थळी धाव

आगीची माहिती मिळताच जवाहरनगर पोलीस आणि आरसीपीच्या जवानांनी घटनास्थळी धाव घेतली. हॉस्पिटल परिसरात गर्दी होऊ नये आणि बचावकार्यामध्ये कोणताही अडथळा निर्माण होऊ नये, यासाठी पोलिसांनी परिस्थिती हाताळली.

दरम्यान, अग्निशमन दलाच्या जवानांनी आग नियंत्रणात आणण्यासाठी प्रयत्न सुरू केले, तर हॉस्पिटलमधील वैद्यकीय कर्मचारी रुग्णांना सुरक्षित बाहेर काढण्यात व्यस्त होते. त्यामुळे काही वेळासाठी संपूर्ण परिसरात मोठी धावपळ उडाली होती.

वेळीच मिळालेली आगीची माहिती, अग्निशमन दलाची तत्परता आणि हॉस्पिटल प्रशासन, पोलीस व वैद्यकीय कर्मचाऱ्यांचा समन्वय यामुळे मोठी दुर्घटना टळली.

शॉर्टसर्किटमुळे आग लागल्याची प्राथमिक शक्यता

प्राथमिक माहितीनुसार, एसीच्या शॉर्टसर्किटमुळे आग लागली असावी, अशी शक्यता व्यक्त करण्यात आली आहे. मात्र आगीचे नेमके कारण अद्याप निश्चित झालेले नाही. अग्निशमन विभाग आणि संबंधित यंत्रणांकडून घटनेची पाहणी आणि तपास केला जाण्याची शक्यता आहे.

आग नेमकी कुठून सुरू झाली, काही विद्युत यंत्रणेत बिघाड झाला होता का, हॉस्पिटलमध्ये अग्निसुरक्षेच्या उपाययोजना पुरेशा होत्या का, तसेच आपत्कालीन परिस्थितीत रुग्णांना बाहेर काढण्यासाठीची व्यवस्था कशी होती, याबाबतही तपास केला जाणार आहे.

अमरावतीतील घटनेनंतर पुन्हा हॉस्पिटलमधील आगीचा प्रश्न ऐरणीवर

या घटनेच्या पार्श्वभूमीवर काही दिवसांपूर्वी अमरावती जिल्ह्यातील स्त्री रुग्णालयात घडलेल्या आगीच्या घटनेचीही आठवण झाली आहे. अमरावती येथील नवजात शिशु कक्षाला लागलेल्या आगीत तीन नवजात बालकांचा दुर्दैवी मृत्यू झाला होता. त्या घटनेनंतर राज्यातील रुग्णालयांमधील अग्निसुरक्षा, विद्युत यंत्रणा आणि आपत्कालीन बचावव्यवस्थेबाबत गंभीर प्रश्न उपस्थित झाले होते.

अशातच आता छत्रपती संभाजीनगरमधील एशियन हॉस्पिटलच्या NICU मध्ये आग लागल्याने पुन्हा एकदा रुग्णालयांच्या सुरक्षेचा मुद्दा चर्चेत आला आहे. विशेषतः NICU, ICU आणि इतर अतिदक्षता विभागांमध्ये उपचार घेत असलेल्या रुग्णांना आपत्कालीन परिस्थितीत सुरक्षितपणे बाहेर काढण्यासाठी पुरेशा सुविधा असणे अत्यंत महत्त्वाचे आहे.

सुदैवाने एशियन हॉस्पिटलमधील आगीच्या घटनेत कोणतीही जीवितहानी झाली नाही. मात्र पहाटेच्या वेळी हॉस्पिटलच्या संवेदनशील विभागात आग लागल्याने रुग्ण आणि त्यांच्या नातेवाईकांमध्ये काही काळ भीतीचे वातावरण निर्माण झाले होते.

आता या आगीमागील नेमके कारण काय होते, हॉस्पिटलमधील अग्निसुरक्षा यंत्रणा कितपत सक्षम होती आणि भविष्यात अशा घटना टाळण्यासाठी कोणत्या उपाययोजना केल्या जाणार, याकडे सर्वांचे लक्ष लागले आहे.