Pune News : रक्षाबंधनाच्या अवघ्या पंधरा दिवस आधी काळाचा घाला; अपघातात बहीण-भावाचा एकाच वेळी मृत्यू

खुटबाव, दौंड : आयुष्याच्या प्रत्येक सुख-दुःखात एकमेकांना आधार देत साथ निभावणाऱ्या बहीण-भावाची अखेरची साथही नियतीने अशीच लिहून ठेवली होती. रक्षाबंधनाचा सण अवघ्या पंधरा दिवसांवर आलेला असताना झालेल्या भीषण अपघातात बहीण आणि भावाचा एकाच वेळी दुर्दैवी मृत्यू झाला. या हृदयद्रावक घटनेने दौंड तालुक्यातील पारगाव परिसरावर शोककळा पसरली आहे.

मोहन बाबासाहेब ताकवणे (वय ५९) आणि त्यांची बहीण सुभद्रा मानसिंग शितोळे (वय ६५) अशी अपघातात मृत्यू झालेल्या बहीण-भावाची नावे आहेत. दोघांनीही आयुष्यभर एकमेकांना आधार दिला. कौटुंबिक परिस्थितीमुळे सुभद्रा यांनी माहेरीच राहण्याचा निर्णय घेतल्यानंतर भाऊ मोहन आणि त्यांच्या कुटुंबीयांनी त्यांना आधार देत आयुष्यभर साथ दिली. त्यामुळे या दोघांमधील नाते केवळ रक्ताचे नव्हते, तर ते जिव्हाळ्याचे आणि भावनिक आधाराचे होते.

बहिणीला माहेरीच दिला आधार

सुभद्रा शितोळे यांचे सासर दौंड तालुक्यातील दुष्काळी पडवी गावात होते. मात्र, १९८०च्या दशकात कौटुंबिक परिस्थितीमुळे त्यांनी पतीसह माहेरी पारगाव येथे राहण्याचा निर्णय घेतला. त्यावेळी भाऊ मोहन ताकवणे आणि त्यांच्या इतर बंधूंनी बहिणीला केवळ भावनिक आधार दिला नाही, तर प्रत्यक्ष मदतीचा हातही पुढे केला.

ताकवणे कुटुंबीयांनी आपल्या मळ्यात सुभद्रा आणि त्यांच्या कुटुंबासाठी जागा उपलब्ध करून दिली. त्या जागेवर घर उभारून देत त्यांनी बहिणीला माहेरी सन्मानाने आणि आधाराने राहण्याची व्यवस्था केली. या मदतीमुळे सुभद्रा यांचे कुटुंब ताकवणे कुटुंबाचा अविभाज्य भाग बनले.

काळ पुढे सरकत गेला, परिस्थिती बदलत गेली; मात्र बहीण-भावातील जिव्हाळा आणि परस्परांचा आधार कायम राहिला. सुख-दुःखाच्या प्रत्येक प्रसंगी मोहन ताकवणे आपल्या बहिणीच्या पाठीशी ठामपणे उभे राहिले.

चार मुलींच्या लग्नात मामाची महत्त्वाची भूमिका

सुभद्रा शितोळे यांना चार मुली आहेत. त्यांच्या मुलींच्या विवाहाच्या वेळीही मामा म्हणून मोहन ताकवणे आणि त्यांच्या बंधूंनी महत्त्वाची जबाबदारी पार पाडली. भाच्यांच्या आयुष्यातील महत्त्वाच्या प्रसंगी त्यांनी मायेने आणि जबाबदारीने भूमिका निभावली.

त्यामुळे सुभद्रा यांचे कुटुंब आणि ताकवणे कुटुंब यांच्यातील नाते आणखी घट्ट झाले. अनेक दशकांपासून एकत्र राहिलेल्या या कुटुंबांमध्ये रक्ताच्या नात्यापलीकडचा आपलेपणा निर्माण झाला होता.

मोहन ताकवणे हे केवळ बहिणीसाठी भाऊ नव्हते, तर तिच्या कुटुंबासाठी आधारवड होते. तर सुभद्रा यांच्यासाठीही भाऊ मोहन यांच्याशी असलेले नाते आयुष्यभराच्या विश्वासाचे होते. त्यामुळे दोघांच्या अचानक झालेल्या मृत्यूने कुटुंबीयांवर दुःखाचा डोंगर कोसळला आहे.

रक्षाबंधनाच्या आधीच काळाने हिरावली भावाची साथ

यंदा रक्षाबंधनाचा सण अवघ्या काही दिवसांवर आला असताना ही दुर्दैवी घटना घडली. बहिण-भावाच्या नात्याचा सण साजरा करण्याआधीच दोघांचा एकाच वेळी मृत्यू झाल्याने परिसरातील नागरिकांनाही मोठा धक्का बसला आहे.

दरवर्षी रक्षाबंधनाच्या निमित्ताने बहिण भावाच्या हातावर राखी बांधते. मात्र, यंदा या कुटुंबात रक्षाबंधनाचा आनंद नसून दुःखाचे सावट आहे. आयुष्यभर एकमेकांच्या सुख-दुःखात सहभागी झालेल्या या बहीण-भावाने अखेरचा प्रवासही एकत्र केल्याची भावना नातेवाईक आणि ग्रामस्थांकडून व्यक्त होत आहे.

एकाच वेळी अंत्यसंस्कार; वातावरण शोकाकुल

या अपघातानंतर दोघांचे पार्थिव मंगळवारी रात्री पारगाव येथील स्मशानभूमीत आणण्यात आले. दोघांवर एकाच वेळी अंत्यसंस्कार करण्यात आले. हा क्षण उपस्थित नातेवाईक, मित्रपरिवार आणि ग्रामस्थांसाठी अत्यंत भावनिक होता.

एकाच कुटुंबाचा आधार असलेल्या बहीण-भावाला एकाच वेळी अखेरचा निरोप देताना उपस्थितांचे डोळे पाणावले. नातेवाईकांचा आक्रोश आणि दुःख पाहून स्मशानभूमीतील वातावरण अत्यंत हृदयद्रावक झाले होते.

आयुष्यभर एकमेकांच्या पाठीशी उभे राहिलेले मोहन ताकवणे आणि सुभद्रा शितोळे अखेरच्या प्रवासातही एकत्र निघून गेल्याने पारगाव परिसरातील ग्रामस्थ सुन्न झाले आहेत.

परिसरात हळहळ

या घटनेची माहिती मिळाल्यानंतर पारगाव आणि खुटबाव परिसरात हळहळ व्यक्त होत आहे. दोघांच्या स्वभावातील आपलेपणा, कुटुंबासाठी त्यांनी केलेली धडपड आणि एकमेकांशी असलेले घट्ट नाते यांची आठवण नातेवाईक आणि ग्रामस्थांकडून सांगितली जात आहे.

एका बाजूला रक्षाबंधनाचा सण जवळ येत असताना दुसऱ्या बाजूला बहीण-भावाच्या नात्याचा असा दुर्दैवी अंत झाल्याने ही घटना अधिकच काळजाला चटका लावणारी ठरली आहे.

मोहन ताकवणे आणि सुभद्रा शितोळे यांच्या निधनाने दोन कुटुंबांवर दुःखाचा डोंगर कोसळला असून, त्यांच्या जाण्याने निर्माण झालेली पोकळी कधीही भरून निघणार नाही. आयुष्यभर एकमेकांना दिलेली साथ आणि अखेरपर्यंत कायम राहिलेल्या या नात्याची आठवण मात्र त्यांच्या कुटुंबीयांच्या आणि पारगावच्या ग्रामस्थांच्या मनात कायम राहणार आहे.