Gadchiroli News: आश्रमशाळेत सर्पदंशाने तीन विद्यार्थिनींचा मृत्यू; तीन जखमी, एकीची प्रकृती गंभीर

गडचिरोली : गडचिरोली जिल्ह्यातील धानोरा तालुक्यातून मन सुन्न करणारी घटना समोर आली आहे. जपतलाई येथील निवासी आश्रमशाळेत झोपलेल्या विद्यार्थिनींना सर्पदंश झाल्याची धक्कादायक घटना घडली. या दुर्घटनेत तीन विद्यार्थिनींचा मृत्यू झाला असून, अन्य तीन विद्यार्थिनी जखमी झाल्या आहेत. जखमी विद्यार्थिनींवर गडचिरोली जिल्हा रुग्णालयात उपचार सुरू आहेत. त्यापैकी एका विद्यार्थिनीची प्रकृती गंभीर असल्याची माहिती समोर आली आहे.या घटनेमुळे आश्रमशाळेतील विद्यार्थिनी, शिक्षक आणि कर्मचाऱ्यांमध्ये भीतीचे वातावरण निर्माण झाले आहे. तसेच मृत विद्यार्थिनींच्या कुटुंबीयांवर दुःखाचा डोंगर कोसळला आहे.

रात्री झोपेत असताना विद्यार्थिनींना सर्पदंश

मिळालेल्या माहितीनुसार, जपतलाई येथील निवासी आश्रमशाळेतील विद्यार्थिनी रात्री जेवण झाल्यानंतर झोपल्या होत्या. रात्री साधारण दोन ते अडीच वाजण्याच्या सुमारास काही विद्यार्थिनींना अचानक त्रास जाणवू लागला. त्यावेळी त्यांना सर्पदंश झाल्याचे निदर्शनास आले.घटनेची माहिती मिळताच आश्रमशाळेतील शिक्षक आणि कर्मचाऱ्यांनी परिस्थितीचे गांभीर्य ओळखून विद्यार्थिनींना तातडीने रुग्णालयात दाखल करण्याची धावपळ सुरू केली. काही विद्यार्थिनींना उपचारासाठी धानोरा येथील रुग्णालयात नेण्यात आले, तर गंभीर प्रकृती असलेल्या विद्यार्थिनींना पुढील उपचारासाठी गडचिरोली जिल्हा रुग्णालयात हलवण्यात आले.

उपचारादरम्यान दोन विद्यार्थिनींचा मृत्यू

धानोरा रुग्णालयात उपचार सुरू असताना इयत्ता सहावीतील दीपिका लकडा आणि इयत्ता आठवीतील सुष्मिता मंडल या दोन विद्यार्थिनींची प्रकृती गंभीर झाली. डॉक्टरांनी उपचार करून त्यांना वाचवण्याचा प्रयत्न केला. मात्र, उपचारादरम्यान दोघींचा मृत्यू झाला.दरम्यान, इयत्ता दुसरीतील अनु कोरेटी हिलाही सर्पदंश झाल्याने गंभीर अवस्थेत गडचिरोली जिल्हा रुग्णालयात दाखल करण्यात आले होते. मात्र, उपचार सुरू असताना अनु कोरेटी हिचाही मृत्यू झाला.अवघ्या काही तासांच्या अंतरात तीन विद्यार्थिनींचा मृत्यू झाल्याने या घटनेने संपूर्ण परिसर हादरला आहे.

तीन विद्यार्थिनींवर उपचार सुरू

या घटनेत जखमी झालेल्या अन्य तीन विद्यार्थिनींवर गडचिरोली जिल्हा रुग्णालयात उपचार सुरू आहेत. त्यामध्ये इयत्ता पाचवीतील दीपिका मदवी, इयत्ता सहावीतील कविता किरंगा आणि इयत्ता आठवीतील समृद्धी सुरेश नैताम यांचा समावेश आहे.यापैकी समृद्धी नैताम हिची प्रकृती गंभीर असल्याची माहिती आहे. डॉक्टरांकडून तिच्यावर उपचार सुरू असून, तिच्या प्रकृतीवर वैद्यकीय पथक लक्ष ठेवून आहे.

आश्रमशाळेतील सुरक्षेचा प्रश्न ऐरणीवर

या घटनेनंतर निवासी आश्रमशाळांमध्ये विद्यार्थ्यांच्या सुरक्षिततेचा प्रश्न पुन्हा एकदा ऐरणीवर आला आहे. ग्रामीण आणि दुर्गम भागातील आश्रमशाळांमध्ये विद्यार्थ्यांच्या निवासाची व्यवस्था असते. अशा ठिकाणी साप, विंचू किंवा इतर विषारी जीवजंतूंपासून विद्यार्थ्यांचे संरक्षण करण्यासाठी आवश्यक ती खबरदारी घेणे अत्यंत महत्त्वाचे ठरते.रात्री झोपलेल्या विद्यार्थिनींना सर्पदंश झाल्याने आश्रमशाळेच्या परिसरात साप कसा आला, विद्यार्थिनी ज्या ठिकाणी झोपल्या होत्या त्या ठिकाणची सुरक्षा व्यवस्था कशी होती आणि सर्पदंशानंतर वैद्यकीय मदत किती वेळेत मिळाली, याबाबत प्रश्न उपस्थित होत आहेत.या घटनेची सविस्तर चौकशी झाल्यानंतर नेमकी कारणे समोर येण्याची शक्यता आहे.