नागपुरात ‘लव्ह ट्रँगल’चा रक्तरंजित शेवट; रेकॉर्डवरील गुन्हेगाराची मित्राने केली हत्या

नागपुरातील नरेंद्र नगर परिसरातील सुंदरबन येथे ‘लव्ह ट्रँगल’मधून एका रेकॉर्डवरील गुन्हेगाराची हत्या झाल्याची धक्कादायक घटना समोर आली आहे. गौरव रगडे या तरुणावर त्याचाच मित्र गौरव प्रभाकर राऊत याने चाकू आणि कुऱ्हाडीने हल्ला केल्याचा आरोप आहे. या हल्ल्यात गंभीर जखमी झालेल्या रगडेचा उपचारादरम्यान मृत्यू झाला. विशेष म्हणजे, दोघांमधील वाद आणि मारामारी तब्बल अर्धा तास रस्त्यावर सुरू असल्याची माहिती प्रत्यक्षदर्शींनी दिली आहे. या प्रकरणी पोलिसांनी मुख्य संशयित गौरव राऊत याला घटनास्थळावरून ताब्यात घेतले आहे.

एका तरुणीमुळे दोन मित्रांमध्ये वाद

पोलिसांच्या प्राथमिक तपासानुसार, या हत्येमागे प्रेमसंबंधातून निर्माण झालेला वाद असल्याचे समोर आले आहे. सुंदरबन परिसरातील ‘सपना’ नावाच्या तरुणीसोबत मयत गौरव रगडेचे गेल्या दोन वर्षांपासून प्रेमसंबंध असल्याची माहिती आहे. त्याच काळात यवतमाळ जिल्ह्यातील दिग्रस येथील रहिवासी असलेल्या गौरव राऊतचीही सपनासोबत ओळख झाली. पुढे या ओळखीचे रूपांतर प्रेमसंबंधात झाल्याचा दावा केला जात आहे.

राऊत सपनासाठी नागपुरात राहायला आला होता. दोघांनी मिळून क्लाउड किचनचा व्यवसायही सुरू केल्याची माहिती समोर आली आहे. त्यामुळे सपनाच्या प्रेमसंबंधावरून दोन्ही गौरवांमध्ये वाद वाढत गेला. हा वाद अखेर जीवघेण्या हल्ल्यापर्यंत पोहोचला.

जामिनावर बाहेर आल्यानंतर पार्टी

गौरव राऊत काही दिवसांपूर्वी एका गुन्ह्यातून जामिनावर बाहेर आला होता. जेलमधून बाहेर आल्यानंतर त्याने मित्रांसाठी पार्टी आयोजित केली होती. या पार्टीला सपना देखील उपस्थित होती. याचवेळी गौरव रगडे तिथे पोहोचला आणि त्याने गोंधळ घातल्याचे सांगितले जात आहे.

रगडेने रागाच्या भरात घराच्या खिडकीच्या काचा फोडल्या आणि घरात घुसण्याचा प्रयत्न केल्याची माहिती आहे. परिस्थिती चिघळत असल्याचे पाहून राऊतने घरातून बाहेर पडून तेथून निघून जाण्याचा प्रयत्न केला. मात्र, रगडेने त्याचा पाठलाग केल्याचे सांगितले जात आहे.

रस्त्यावर अर्धा तास थरार

यानंतर दोघांमध्ये रस्त्यावरच जोरदार मारामारी सुरू झाली. जवळपास 30 मिनिटे हा संघर्ष सुरू असल्याची माहिती प्रत्यक्षदर्शींनी दिली. दोघेही एकमेकांवर हल्ला करत असल्याने परिसरात मोठी खळबळ उडाली.

या संघर्षादरम्यान गौरव राऊतने कमरेजवळ लपवून ठेवलेला चाकू बाहेर काढल्याचा आरोप आहे. त्याने रगडेच्या छातीवर चाकूने वार केला. त्यानंतर कुऱ्हाडीनेही हल्ला केल्याची माहिती समोर आली आहे. या हल्ल्यात रगडे गंभीर जखमी झाला.

पांढरा शर्ट रक्ताने माखला

प्रत्यक्षदर्शींनी दिलेल्या माहितीनुसार, हल्ल्यानंतर गौरव रगडेची अवस्था गंभीर झाली होती. त्याच्या पांढऱ्या शर्टवर मोठ्या प्रमाणात रक्त लागले होते. जखमी अवस्थेत तो रस्त्यावर झोकांड्या खात असल्याचे आणि त्याला व्यवस्थित हालचालही करता येत नसल्याचे प्रत्यक्षदर्शींनी सांगितले.

घटनेची माहिती मिळताच पोलिसांनी तातडीने घटनास्थळी धाव घेतली. गंभीर जखमी रगडेला उपचारासाठी रुग्णालयात दाखल करण्यात आले. मात्र, डॉक्टरांनी त्याला मृत घोषित केले.

मयत रगडेवर नऊ गंभीर गुन्हे

गौरव रगडे हा नागपुरातील रेकॉर्डवरील गुन्हेगार असल्याची माहिती पोलिसांनी दिली आहे. अजनी पोलिस ठाण्याच्या हद्दीत त्याच्याविरोधात हत्या, हत्येचा प्रयत्न, दरोडा यांसह सुमारे नऊ गंभीर गुन्ह्यांची नोंद असल्याचे समोर आले आहे.

या हत्येप्रकरणी पोलिसांनी गौरव प्रभाकर राऊत याला ताब्यात घेतले असून, हत्येमागील नेमका घटनाक्रम, वापरण्यात आलेली शस्त्रे आणि प्रेमसंबंधातील वादाची पार्श्वभूमी याबाबत तपास सुरू आहे.

दरम्यान, नागपुरात गुन्हेगारीच्या घटनांमध्ये वाढ होत असतानाच रस्त्यावर जवळपास अर्धा तास सुरू असलेल्या या रक्तरंजित संघर्षाने परिसरात खळबळ उडाली आहे. एका तरुणीशी संबंधित प्रेमसंबंधातून सुरू झालेला वाद अखेर एका तरुणाच्या जीवावर बेतल्याने या घटनेची चर्चा शहरात सुरू आहे.