लाल किल्ल्यावरून PM मोदींचा मोठा संकल्प; 2047 पर्यंत विकसित भारत, आत्मनिर्भरतेवर भर
15 Aug 2026 9 Viewsभारताच्या ८० व्या स्वातंत्र्यदिनी पंतप्रधान नरेंद्र मोदी यांनी शनिवारी लाल किल्ल्यावर तिरंगा फडकवत देशाला संबोधित केले. पंतप्रधान म्हणून लाल किल्ल्यावरून मोदींचे हे सलग १३ वे स्वातंत्र्यदिनाचे भाषण ठरले. यंदाच्या सोहळ्यात प्रथमच लाल किल्ल्यावर ‘वंदे मातरम्’चे सूर निनादले. या ऐतिहासिक प्रसंगाच्या पार्श्वभूमीवर मोदींनी स्वातंत्र्यसैनिकांना अभिवादन करत २०४७ पर्यंत ‘विकसित भारत’ घडवण्याचा संकल्प देशासमोर मांडला.
देशातील पूरस्थितीचा उल्लेख करत मोदींनी बाधित कुटुंबांप्रती संवेदना व्यक्त केली. “आज तिरंगा प्रत्येक घरात आणि प्रत्येक हृदयात आहे,” असे सांगत त्यांनी देशवासीयांना नव्या उत्साहाने आणि दृढ निश्चयाने पुढे जाण्याचे आवाहन केले. मोठी स्वप्ने पाहिल्याशिवाय देश मोठी झेप घेऊ शकत नाही, असा संदेशही त्यांनी दिला.
२०४७ पर्यंत विकसित भारताचा संकल्प
भारताच्या स्वातंत्र्याला १०० वर्षे पूर्ण होतील, तोपर्यंत देशाला विकसित राष्ट्र बनवण्याचा निर्धार मोदींनी पुन्हा एकदा व्यक्त केला. जगातील सर्वाधिक लोकसंख्या असलेला देश जेव्हा विकसित होण्याचा संकल्प करतो, तेव्हा जगाचा भारताकडे पाहण्याचा दृष्टिकोन बदलतो, असे ते म्हणाले.
गेल्या काही वर्षांत भारताने केलेल्या प्रगतीचा उल्लेख करत मोदींनी १२ वर्षांत २५ कोटी नागरिक गरिबीतून बाहेर आल्याचा दावा केला. भारत वेगाने वाढणारी प्रमुख अर्थव्यवस्था बनला असून १४० कोटी भारतीयांच्या सामूहिक संकल्पाला रोखणे आता कठीण असल्याचे त्यांनी सांगितले.
उत्पादन क्षेत्रातील वाढीचा उल्लेख
संरक्षण क्षेत्रातील उत्पादनात चारपट, खादी आणि ग्रामोद्योगाच्या उत्पादनात पाचपट, तर इलेक्ट्रॉनिक्स उत्पादनात सातपट वाढ झाल्याचे मोदींनी सांगितले. रेल्वे डब्यांच्या निर्मितीत २१ पट आणि मोबाईल फोनच्या उत्पादनात ३३ पट वाढ झाल्याचा दावा त्यांनी केला. इंटरनेट वापरकर्त्यांची संख्या चौपट, तर डिजिटल व्यवहारांमध्ये तब्बल १०० पट वाढ झाल्याचेही त्यांनी अधोरेखित केले.
पाणी, गॅस, घरे आणि स्वच्छता क्षेत्रातील योजनांचा वेग वाढल्याचे सांगत मोदींनी सरकारच्या विविध कल्याणकारी योजनांचा उल्लेख केला. नळाद्वारे पाणीपुरवठ्याच्या जोडण्यांचा वार्षिक वेग १५ पटींनी, गॅस जोडण्यांचा वेग सहा पटींनी वाढल्याचे त्यांनी सांगितले.
आत्मनिर्भर भारतावर भर
जागतिक बाजारपेठेवर अतिप्रमाणात अवलंबून राहणे भारताच्या हिताचे नाही, असे पंतप्रधान मोदी म्हणाले. देशाने स्वतःची उत्पादनक्षमता आणि क्षमता वाढवून आत्मनिर्भर होणे गरजेचे असल्याचा त्यांनी पुनरुच्चार केला.
जागतिक संकटांच्या काळात आत्मनिर्भरतेचे महत्त्व अधिक स्पष्ट झाल्याचे सांगत मोदींनी कोविड-१९ महामारी आणि रशिया-युक्रेन युद्धाचा संदर्भ दिला. संकटाच्या काळात गॅस, पेट्रोल आणि खतांचा पुरवठा सुरळीत ठेवण्यात भारताला यश आल्याचे त्यांनी सांगितले. शेतकऱ्यांना युरिया आणि डीएपी खत उपलब्ध करून देण्याचाही त्यांनी उल्लेख केला.
ऊर्जा सुरक्षेला प्राधान्य
ऊर्जा सुरक्षा ही भारतासाठी काळाची गरज असल्याचे मोदींनी स्पष्ट केले. देशाला मोठ्या प्रमाणात विजेची गरज असून ऊर्जा क्षेत्रात आत्मनिर्भरता वाढवण्यावर भर देण्यात येत असल्याचे त्यांनी सांगितले.
सौर ऊर्जेच्या क्षेत्रातील भारताच्या प्रगतीचा उल्लेख करताना २०१४ पूर्वीची सुमारे २ गिगावॅट क्षमता आता १६० गिगावॅटपर्यंत पोहोचल्याचे त्यांनी सांगितले. ‘पीएम सूर्य घर मोफत वीज योजना’मुळे अनेक घरांमध्ये सौरऊर्जा यंत्रणा बसवण्याचे काम सुरू असून काही कुटुंबांची वीज बिले शून्यावर आली आहेत, असेही त्यांनी नमूद केले.
पाईपद्वारे गॅसपुरवठ्याचा विस्तार, रेल्वे विद्युतीकरण आणि हायड्रोजनवर चालणाऱ्या रेल्वेच्या दिशेने झालेली वाटचाल यांचाही मोदींनी उल्लेख केला.
‘वर्क कल्चर’ बदलण्याचे आवाहन
देशाला विकसित राष्ट्र बनवायचे असेल तर केवळ सरकारी योजनांवर अवलंबून न राहता काम करण्याची पद्धत आणि मानसिकता बदलण्याची गरज असल्याचे पंतप्रधान मोदी म्हणाले. प्रत्येक नागरिकाने आपली उद्दिष्टे मोठी ठेवून योगदान देण्याचे आवाहन त्यांनी केले.
“रिफॉर्म्स एक्सप्रेस”मध्ये भारत स्वार झाला आहे, असे सांगत मोदींनी सुधारणा ही सरकारची केवळ राजकीय भूमिका नसून दृढ धारणा असल्याचे स्पष्ट केले. शेतकरी, युवा आणि महिलांच्या सामर्थ्यावर आपला विश्वास असल्याचेही त्यांनी सांगितले.
एकूणच, ८० व्या स्वातंत्र्यदिनी लाल किल्ल्यावरून मोदींच्या भाषणात विकसित भारत २०४७, आत्मनिर्भरता, ऊर्जा सुरक्षा, उत्पादनवाढ, तंत्रज्ञान, सुधारणा आणि बदलते वर्क कल्चर या मुद्द्यांवर विशेष भर राहिला. भारताने मोठी स्वप्ने पाहून त्यांची पूर्तता करण्यासाठी वेगाने पुढे जाण्याची गरज असल्याचा संदेश पंतप्रधानांनी देशाला दिला.